الرئيسية / تعليم إلكتروني / رسائل وزير التربية والتعليم الجديد للمعلم والطالب وولى الأمر والمدرسة
وزير التربية والتعليم

رسائل وزير التربية والتعليم الجديد للمعلم والطالب وولى الأمر والمدرسة

رسائل هامة من وزير التربية والتعليم الجديد لكل من المعلم والطالب والمدرسة , رؤية الدكتور طارق شوقي وزير التربية والتعليم لمشاكل التعليم والمعلمين في مصر عن قرب ، حيث يبحث العديد من المهتمين بملف التعليم في مصر عن وزير التعليم الجديد عن قرب واللى عايز يفهم الراجل ده ناوي يعمل إيه بالظبط في حل مشاكل التعليم ، وكان لنا لقاء عن ام ملفات تواجه الدكتور طارق شوقي وزير التربية والتعليم والتعليم الجديد ، واهم ما جاء من رسائل في اجتماع وزير التربية والتعليم الجديد الدكتور طارق شوقي مع الصحفيين وتصريحات عن مجانية واصلاح التعليم.

مشاكل التعليم المجاني والدروس الخصصوية

حيث قال الدكتور طارق شوقي على الورق التعليم مجاني لكن في الحقيقة مش مجاني بدليل إن فيه 30 مليار بيدفعها الأهالي على الدروس الخصوصية، هو بقى عايز ياخد جزء من الفلوس دي بفرض ضرائب على مراكز الدروس الخصوصية ومن خلالها هيطور التعليم ويبني مدارس من غير ما يحتاج للدولة تزود له فلوس للتطوير ، واضاف وير التربية والتعليم انا مش ضد الدروس الخصوصية لكن تكون بشروط ومعايير، مين يدي دروس وإيه مواصفاته وهل مؤهل للمهنة ولا لا، وهل المكان اللى هيدي فيه درس مناسب وآدمي ولا لا ، وهل من حق أي حد يفتح مركز خصوصي ولا لا و من حقه يدي درس لكن مش من حقه فرض ده على الطالب ولا إنه يبقى ماسكه من إيده اللى بتوجعه.

رواتب المعلمين في مصر

واضاف الدكتور طارق شوقي وزير التربية والتعليم لما اتكلم عن المعلم قال إنه المفروض يكون راتبه أعلى راتب في الدولة وإنه يبقى رقم واحد في المكانة الاجتماعية والثقافية والاقتصادية يعني هيبته ترجع، واضاف ان الامتحانات للأسف بتعتمد على الإجابات النموذجية مش الفكر والابتكار النموذجي علشان كده بقى فيه بعبع في كل بيت مصري، أنا هقضي على البعبع وألغى فكرة الإجابة النموذجية دي علشان الطالب يبتكر ويبدع في إجابته.

وعندما تكلم وزير التربية والتعليم الجديد عن المدرسة قال للأسف بقت سجن كبير بالنسبة للطلبة، يبقوا رايحين متنكدين وهما مروحين منها مبسوطين، ولازم المناهج تخفف حتى لو هلغي ربع أو نص المقرر وأقلل المواد وأزود الأنشطة والألعاب، و لأن التعليم مش بكترة المواد اللى ممكن تخلي الطالب يكره نفسه و التعليم يعني تحب المدرسة وتبقى فرحان وانت رايح ، واضاف للأسف بقى مجرد امتحان ثم شهادة ثم زواج ثم قاعدة في البيت، يبقى هنا التعليم ملوش لازمة و لازم لما الطالب يتعلم يبقى بيتعلم علشان هدف مش مجرد حامل للشهادة اللى بيروح يخطب ويتجوز بيها وهو مش متعلم حاجة لحياته.

تعديل المناهج

وعندما تكلم الدكتور طارق شوقي عن الأطفال الصغيرين واللى لسه هيدخلوا المدرسة قالك لازم أنزل لمستوى فكرهم سواء بالمنهج أو بشخصية المعلم نفسه، يعني لازم المنهج يناسب سنهم والمدرس يكون متدرب على معاملة السن ده مش يكون واحد معندوش ثقافة التعامل مع الطفل، وهيكون فيه تعامل مختلف مع القضية دي ، وهو نفسه قال لما لقيت معظم الأطفال بيلعبوا بلاي ستيشن اتعلمت البلاي ستيشن علشان أكون قريب من دماغهم وسنهم ، و عن الخبرات اللى ممكن يستعين بيها رد وقال إن أي شخصية عندها رؤية جادة وواقعية للتطوير هيكون ليها دون في الوزارة، ودور يعني هيتم تكليفها بملف معين وملف معين يعني طل فريق هيكون مسئول عن ملف يتحرك فيه وينجزه في وقت معين مش أنا لوحدي اللى هعمل كل حاجة ولازم يكون فيه مجموعة فرق مسئولة عن ملفات.

دور الاعلام في تربية وتعليم الاطفال

كما كشف الدكتور طارق شوقي عن دور الإعلام و قال إن دوره لا يقل عن دور أي مسئول في الوزارة، ومن خلاله هيكون فيه قياس لمدى رضا أو غضب الناس في الشارع، هو من يقيم أداء الوزارة وهو من يخاطب الناس بالحقيقة ويوصل أرائهم.. والوزارة والإعلام في مركب واحد.. ومش هقول حاجة للإعلام محصلتش.. والحاجة اللى مش عارفها هقول معرفهاش، مش هخبي حاجة ولا هضحك على حد واللى هيحصل هنقوله وبس.

نظام البوكليت وامتحانات الثانوية العامة

وعندما تكلم عن نظام امتحانات الثانوية العامة الجديد اللى اسمه “البوكليت” قال إنه بيقتل الفكر والإبداع آه والدولة مش عاجبها ده آه بس ده حل مؤقت لأزمة تسريب الامتحانات، وده مش هيستمر ولازم نشوف حل تاني بس ده حل مؤقت، و عن طريقة التدريس نفسها قال لازم تتغير في القريب العاجل.. لازم تكون طريقة الشرح جديدة ومقنعة ، ومش هستنى لما الطالب ينام في الفصل من المدرس ولا لما الطالب يعتدي على مدرس ولا معلم يعتدي على طالب.

دور المدرسة وهيبة المعلم

واضاف وزير التربية والتعليم المدرسة لازم ترجع هيبتها وتكون هي أهم مبني في أي مدينة أو حي، وطريقة الشرح الحالية في المدارس مجرد حفظ وتلقين واستماع.. ده هيتغير وان الدول اللى بره مش أحسن مننا ، لما اتكلم عن غضب أولياء الأمور والطلاب والمعلمين من القرارات اللى بتطلع من الوزارة فجأة، قال إن ده مش هيتكرر ودي تعليمات الرئيس.. وهيكون هناك استطلاع رأي لكل الآراء قبل أي قرار ، وان الوزارة لوحدها مش صاحبة القرار قد الناس نفسها ما هي اللى صاحبة الحق في رفض أو قبول القرار، وهيكون فيه موقع خاص لإبداء الرأي وتلقي الشكاوي والرد عليها خلال فترة زمنية محددة بفريق مختص لذلك.

دور المدارس الخاصة في مصر

وكشف الدكتور طارق شوقي وزير التربية والتعليم عن المدارس الخاصة قال إن من حق ولي الأمر يقدم لابنه في مدرسة مصروفاتها 20 ألف ومدرسة تانية مصروفاتها 2000 جنيه.. بس الأول هسأل صاحب المدرسة: ايه الخدمة التعليمية اللى تمنها 20 ألف؟ بتعمل إيه جديد في التعليم يساوي المبلغ ده؟و هل التعليم عندك يساوي 20 ألف؟ إن لقيته يساوي أهلا وسهلا مش يساوي يبقى ده ابتزاز، واضاف والوزارة مش هتقف تتفرج على ابتزاز أي مدرسة خاصة، كان هذا ملخص اجتماع وزير التربية والتعليم الجديد الدكتور طارق شوقي مع الصحفيين لنتعرف هو إيه وبيفكر إزاي وإيه خطته ، لأنك انت اللى هتحدد هل ده أمين على مستقبل ابنك ولا لأ.

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

Free WordPress Themes